संशयित सुवर्णकार अजित मसुरकर याला दोन दिवसाची वन कोठडी
कुडाळ | प्रतिनिधी
सिंधुदुर्ग जिल्ह्यातील कुडाळ बाजारपेठ येथील ‘मसुरकर जेम्स’ या दुकानावर वनविभागाने छापा टाकून वन्यप्राण्यांच्या अवयवांची मोठी तस्करी उघडकीस आणली आहे. या कारवाईत ६ बिबट नखे, २० बिबट नखांचे अवयव, २ बिबटचे सुळे (दात) आणि वन्यप्राण्यांच्या शिंगापासून तयार केलेली ६ नखे असा मुद्देमाल जप्त करण्यात आला आहे. या प्रकरणी दुकानाचा मालक अजित वसंत मसुरकर याला अटक करण्यात आली असून, न्यायालयाने त्याला २ दिवसांची वन कोठडी सुनावली आहे.
याबाबत वनविभागाने दिलेल्या माहितीनुसार, ३० जून रोजी वनक्षेत्रपाल सं.व.अ.नि. सावंतवाडी यांना कुडाळ बाजारपेठ येथील मसुरकर जेम्स या दुकानात वन्यप्राण्यांच्या अवयवांची बेकायदेशीर विक्री होत असल्याची गोपनीय माहिती मिळाली होती. या माहितीच्या आधारे वनक्षेत्रपाल सं.व.अ.नि. सावंतवाडी आणि वनपरिक्षेत्र अधिकारी कुडाळ यांच्या संयुक्त पथकाने दोन पंचांसमक्ष सदर दुकाची झडती घेतली. या झडतीदरम्यान वन्यजीव संरक्षण अधिनियम १९७२ च्या अनुसुची-१ मधील संरक्षित प्राणी असलेल्या बिबट्याची शिकार करून, त्यापासून मृगयाचिन्हे तयार करून विक्री करण्याच्या उद्देशाने ठेवलेला मुद्देमाल जप्त करण्यात आला.
याप्रकरणी सावंतवाडी वनविभागाने प्र.गु.रि. ०७/२०२६ दि. ३०.०६.२०२६ अन्वये गुन्हा नोंदवला आहे. आरोपीने गुन्हा मान्य केल्यानंतर त्याला कुडाळच्या प्रथम वर्ग न्यायदंडाधिकारी न्यायालयात हजर केले असता, न्यायालयाने त्याला दोन दिवसांची वन कोठडी सुनावली.
सदरची मोठी कारवाई उपवनसंरक्षक सावंतवाडी मिलीश शर्मा (IFS) आणि विभागीय वनअधिकारी (दक्षता) कोल्हापूर संजय वाघमोडे यांच्या मार्गदर्शनाखाली तसेच डॉ. सुनील लाड यांच्या नेतृत्वाखाली पार पडली. कारवाईत सावंतवाडीचे वनक्षेत्रपाल सचिन शिडतुरे, कुडाळचे वनपरिक्षेत्र अधिकारी चेतन पाटील, वनपाल महेश पाटील, पोह गौरेश राणे, मालवणचे वनपाल सदानंद परब, नेरूरचे वनपाल सूर्यकांत सावंत, वनरक्षक समीर खरवत, रवींद्र पाटील, श्रीमती रिषीका होले (महिला कर्मचारी असल्याने ‘श्रीमती’ कायम ठेवले आहे), प्रसाद पाटील, चालक राहुल मयेकर आणि नितीन सावंत यांनी महत्त्वाची भूमिका बजावली.
सिंधुदुर्ग जिल्हा निसर्गसंपन्न असून येथे बिबट, रानगवा, सांबर, खवलेमांजर, पिसोरी यांसारख्या संरक्षित वन्यजीवांचा अधिवास आहे. वन्यजीव संरक्षण अधिनियम १९७२ नुसार या प्राण्यांची शिकार करणे, त्यांचे अवयव किंवा मृगयाचिन्हे बाळगणे अथवा त्यांचा व्यापार करणे हा गंभीर गुन्हासून यामध्ये ७ वर्षांपर्यंत कारावास आणि आर्थिक दंडाची तरतूद आहे. अशा प्रकारचे बेकायदेशीर कृत्य आढळल्यास तात्काळ वनविभागाशी संपर्क साधावा, माहिती देणाऱ्याचे नाव गोपनीय ठेवले जाईल, असे आवाहन उपवनसंरक्षक मिलीश शर्मा यांनी केले आहे.
