*🎭 मी… दशावतार बोलतेय!*

*होय… मीच ती दशावतार लोककला…*

*समीर महाडेश्वर*

सुमारे आठशे वर्षांपासून कोकणच्या पवित्र भूमीत रुजलेली…संत, भक्त, कलाकार आणि रसिकांच्या प्रेमाने फुललेली…असंख्य पिढ्यांनी जिवापाड जपलेली…

मी फक्त एक नाट्यप्रयोग नाही…मी महाराष्ट्राच्या संस्कृतीचा आत्मा आहे.

एकेकाळी मंदिरांच्या अंगणात…गावच्या जत्रांमध्ये…चांदण्यांच्या साक्षीने…टाळ, मृदंग आणि पखवाजाच्या नादात मी अवतरायचे.

माझ्या रंगमंचावर देव यायचे…धर्माचा विजय व्हायचा…अधर्माचा पराभव व्हायचा…आणि हजारो रसिक माझ्यावर प्रेमाचा वर्षाव करायचे.

माझ्यासाठी कित्येक मालकांनी आयुष्य वेचले…

कर्ज काढले…घरदार गहाण ठेवले…स्वतःच्या संसारापेक्षा मला मोठे मानले…

कितीतरी कलाकारांनी भूक, तहान, थकवा विसरून माझी सेवा केली…

म्हणूनच मी आजपर्यंत जिवंत राहिले.

पण…

आज माझ्या मनात एक वेदना आहे.

माझ्याच नावावरून माझी माणसं एकमेकांवर आरोप करताना पाहते…एकमेकांचा सन्मान कमी करताना पाहते…आणि ते पाहून माझे हृदय व्याकूळ होते.

माझ्या लेकरांनो…

मालक नसतील तर माझा रंगमंच कोण उभा करेल?

कलाकार नसतील तर माझ्या पात्रांना जीव कोण देईल?

रसिक नसतील तर माझ्या कलेला दाद कोण देईल?

तुम्ही सर्व माझेच आहात.

कोणी मोठा नाही…कोणी लहान नाही…

माझ्यासाठी मालकही तितकाच महत्त्वाचा…कलाकारही तितकाच महत्त्वाचा…आणि रसिकही तितकाच महत्त्वाचा.

म्हणून माझ्यासाठी भांडू नका…

माझ्यासाठी एकत्र या.

शासनाकडे माझ्या विकासासाठी लढा…कलाकारांच्या हक्कांसाठी आवाज उठा…मालकांच्या अडचणीही समजून घ्या…

पण…

एकमेकांचा अपमान करून माझा सन्मान वाढत नाही.

कारण…

मी कोणाची नाही… मी तुमच्या सर्वांची आहे.

मी कलाकाराच्या कलेत आहे…मी मालकाच्या कष्टात आहे…मी वादकाच्या सुरात आहे…मी रसिकांच्या टाळ्यांत आहे…

माझे अस्तित्व तुमच्या एकजुटीत आहे.

माझे रक्षण आरोपांनी होणार नाही…माझे रक्षण एकतेने होईल.

चला…

माझा मान राखा…माझी परंपरा जपा…माझी माणसं जपा…

माझ्या पुढच्या पिढीलाही अभिमानाने म्हणता यावे—

“हा आपल्या कोकणचा, आपल्या महाराष्ट्राचा दशावतार आहे.”

🙏 आपला,

*समीर तुकाराम म्हाडेश्वर*

   *दशावतार कलाकार*

  *माणगाव,ता.कुडाळ*