आचरा येथील हार्डवेअर दुकानला भीषण आग ; आगीत दुकानातील माल जळून पूर्ण खाक ; इमारतीचेही मोठे नुकसान झाले

0

मालवण | प्रतिनिधी 

आचरा मालवण रस्त्यावर हुतात्मा स्मारक च्या पुढे असलेल्या भक्ती हार्डवेअर इलेक्ट्रीक सामान असलेल्या दुकानाला आज पहाटेच्या सुमारास लागलेल्या आगीत दुकानातील साहित्य अक्षरशः जळून खाक झाले.आगीची तीव्रता एवढी होती की आगीमुळे स्लॅबच्या इमारतीलाही तडे पडले असून इमारतीचेही मोठे नुकसान झाले आहे.
पहाटे मॉर्निंगवॉक ला जाणाऱे भोसले यांना या दुकानाला आग लागल्याचे लक्षात येताच त्यांनी दुकान मालक विनोद गवळी व स्थानिकांना माहिती दिली. स्थानिकांनी धाव घेत आग विझवण्यासाठी शर्तीचे प्रयत्न चालू केले होते. यावेळी मालवण नगरपालिकेचा अग्निशमनबंब ही पाचारण करावा लागला होता. स्थानिक ग्रामस्थांच्या प्रसंगावाधामुळे सुदैवाने या इमारतीलगतची दुकानांना आगीची झळ बसली नाही अन्यथा मोठी हानी होण्याची शक्यता होती. लागलेली आग दोन तासाच्या अथक प्रयत्नानंतर आटोक्यात आली होती. शॉर्टसर्किटमुळे आग लागल्याची शक्यता वर्तविण्यात येत आहे. सुमारे सव्वा कोटी रुपयाचे नुकसान झाले असल्याची माहिती दुकान मालक विनोद गवळी यांनी दिली. घटनेची माहिती मिळताच आचरा पोलीस घटनास्थळी दाखल झाले होते.
आग लागल्याचे समजताच आचरा सरपंच जेरॉन फर्नांडीस, ग्रामस्थ संदिप पांगम,अभिजित सावंत, विजय कदम, उपसरपंच संतोष मिराशी, मुबंई येथील अग्निशामक दलाचे सेवानिवृत्त कर्मचारी सुहास हडकर, विद्यानंद परब, माणिक राणे, राजन पुजारे, जयप्रकाश परुळेकर, राजन गांवकर, मुजफ्फर मुजावर, दिलीप कावले यांसह अन्य ग्रामस्थांनी धाव घेत आग आटोक्यात आणण्यासाठी प्रयत्न चालू केले होते. आग विझवताना पाण्याचा तुटवडा निर्माण झाला होता यावेळी माजी सरपंच मंगेश टेमकर, ग्रामपंचायत सदस्य चावलं मुजावर यांनी आग विझवण्यासाठी पाणी उपलब्ध करून दिले.लगतच्या दुकानांना झळ बसू नये म्हणून ग्रामस्थांनी प्रसंगावधान राखून लगतच्या दुकानातील माला बाहेर काढण्यासाठी तत्परता दाखविली होती.